Наримон Умаров Тошкент вилояти сайловчилари билан учрашди

Тошкент, Ўзбекистон (UzDaily.uz) -- Адолат” социал-демократик партиясидан Ўзбекистон Республикаси Президентлигига номзод Наримон Умаров 28-ноябрь куни Тошкент вилояти сайловчилари билан учрашди.

Видеомулоқот шаклида ташкил этилган учрашувни Ўзбекистон “Адолат” социал-демократик партияси Тошкент вилояти кенгаши раиси Р.Толипов очди. Президентликка номзоднинг ишончли вакили М.Бердиқулова йиғилганларни номзоднинг таржимаи ҳоли билан таништирди.

Ўзбекистон Республикаси Президентлигига номзод Наримон Умаров ўз сайловолди дастури юзасидан нутқ сўзлади.

Биринчи Президентимиз раҳнамолигида мустақиллик йилларида амалга оширилган кенг кўламли ислоҳотлар самарасида Тошкент вилоятининг ижтимоий-иқтисодий салоҳияти юксалди. Мамлакатимизда ишлаб чиқарилаётган саноат маҳсулотларининг қарийб 15 фоизи, қишлоқ хўжалиги маҳсулотларининг 12 фоиздан ортиғи, иқтисодиётимизга жалб этилаётган инвестицияларнинг тахминан 10 фоизи, ялпи ички маҳсулотнинг 9,7 фоизи айни шу вилоят ҳиссасига тўғри келмоқда.

Наримон Умаров сайловчиларни ўз сайловолди дастурининг асосий йўналишлари билан таништирар экан, унда илгари сурилган ғоялар “Адолат” социал-демократик партиясининг ижтимоий йўналтирилган бозор иқтисодиётига асосланган ҳуқуқий-демократик давлат, маънавий ва ахлоқий етук адолатли фуқаролик жамияти барпо этиш борасидаги дастурий мақсад ва вазифаларига асосланганини таъкидлади.

Инвестиция таклифларини чуқур ўрганиш ва инвесторларнинг ишлаб чиқаришни модернизация қилиш, янги техника ва технологияларни киритиш, рақобатбардош, юқори қўшимча қийматга эга маҳсулотлар ишлаб чиқарилишини таъминлаш бўйича мажбуриятларини қатъий назоратга олиш асносида корхона ва муассасаларни босқичма-босқич хусусийлаштириш сиёсатини давом эттиришга алоҳида эътибор қаратилган.

Учрашувда Ўзбекистон Республикаси Олий Мажлиси Қонунчилик палатаси депутати Л.Кошелапова, Тошкент вилояти кўп тармоқли марказий шифохонаси бош шифокори Б.Қосимов, халқ депутатлари Тошкент вилояти Кенгаши депутати К.Ҳамидова, “Тўйтепа Агро Макс” масъулияти чекланган жамияти раҳбари У.Шоумаров, “Ўзбекистон темир йўллари” акциядорлик жамияти капитал қурилиш дирекцияси режалаштириш бўлими етакчи мутахассиси Е.Аблаева ва бошқалар номзоднинг сайловолди дастури хусусида фикр билдириб, сайловга тайёргарлик жараёни миллий қонунчилигимиз ва умумэътироф этилган халқаро нормаларга мувофиқ ўтаётганини таъкидлади. Сайловчиларни 2016-йил 4-декабрь куни бўлиб ўтадиган Ўзбекистон Республикаси Президенти сайловида фаол иштирок этишга чақирди.