Toshkent, O‘zbekiston (UzDaily.uz) — 2024-yilda O‘zbekiston aeroportlari 13,5 mln yo‘lovchini qabul qildi, bu 2023-yilga nisbatan 30% ga ko‘pdir. 2023-yilda ko‘rsatkich 10,41 mln kishini tashkil etgan edi, deb xabar beradi Uzbekistan Airports.

Uchish va qo‘nish operatsiyalari soni 28,5% ga oshib, 110 184 tani tashkil etdi.

Bundan tashqari, 2024-yilda O‘zbekistonga Flyadeal, LOT Polish Airlines, Qatar Airways, World2Fly va Iberojet kabi yangi aviakompaniyalar parvozlarni yo‘lga qo‘ydi.

Mamlakat aeroportlari orqali 95,05 ming tonna yuk tashildi, bu 2023-yilning shu davriga nisbatan 33% ga ko‘pdir.

Yaqin kunlarda Toshkentda yangi yuk terminalining ochilishi rejalashtirilgan.

2024-yilda Urganch va Toshkent xalqaro aeroportlari rekonstruksiya qilindi. Shuningdek, Andijon aeroportini modernizatsiya qilish ishlari davom etmoqda.