Ташкент, Узбекистан (UzDaily.uz) – Хитойнинг Циан шаҳрида давом этаётган спорт курашлари бўйича Осиё чемпионати доирасида бугун юнон-рим кураши усталари ҳам баҳсларга киришдилар. Қувонарлиси, ушбу кун дастурида гиламга чиққан вакилларимиз 1 та олтин, 2 та кумуш ва 1 бронза медалларига сазовор бўлишди.

-55 кг вазн тоифасида курашган Нанкин ўсмирлар Олимпиадаси чемпиони Исломжон Баҳромов финалда япониялик Хироми Катагари билан беллашди. Баҳсда 1:1 ҳисобида қайд этилган бўлса-да, сўнгги очко вакилимиз томонидан қўлга киритилгани устунликни Баҳромовга тақдим этди ва шу тариқа у Осиё чемпионлигини қўлга киритди.

-63 кг вазн тоифасида Рио Олимпиадасида бронза медали совриндори Элмурат Тасмурадов финалда хитойлик Эрбату Туо билан баҳсда 3:2 ҳисобида олдинда бораётган пайт жароҳат олди ва мураббийларимиз таваккал қилмай, курашчимизга баҳсни давом эттиришга рухсат беришмади. Шу тариқа Тасмурадов кумуш медаль билан тақдирланди. Шунингдек, -130 кг вазн тоифасидаги полвонимиз Мўминжон Абдуллаев ҳам финалда имкониятни бой бериб, иккинчи ўринни эгаллади.

Жаҳон чемпионати финалчиси Рустам Ассакалов (-87 кг) ҳам қитъа биринчилигидан медаль билан қайтадиган бўлди. Ассакалов бронза медали учун кечган беллашувда япониялик Масато Сумидан 9:1 ҳисобида устун келди.

Манба: Ўзбекистон миллий олимпия қўмитаси.