Тошкент, Ўзбекистон (UzDaily.uz) — 2025 йил 1 июлдан бошлаб ҳайдовчилик ҳужжатларини электрон кўринишда тақдим этиш мумкинлиги ҳақидаги ижтимоий тармоқларда тарқалган хабарлар муносабати билан Йўл ҳаракати хавфсизлиги бош бошқармаси (ЙҲХББ) расмий баёнот билан чиқди.

Хабарларда гўёки ҳайдовчилар MyGov иловаси ёки «Ижтимоий карта» орқали ўз ҳужжатларини ДПС ходимларига кўрсатишлари мумкинлиги айтилган эди. Аммо ЙҲХББ бу маълумотни рад этди.

Идора таъкидлашича, ҳайдовчилар ҳанузгача транспорт воситасини бошқариш ҳуқуқини ва автомашинани рўйхатдан ўтказишни тасдиқловчи ҳужжатларнинг оригиналларини тақдим этишга мажбурдирлар. Электрон шаклдаги ҳужжатлар фақат қўшимча маълумот манбаси сифатида қабул қилиниши мумкин, аммо қоғоз шаклдаги ҳақиқий ҳужжатларнинг ўрнини босмайди.

ЙҲХББ амалдаги қонунчиликка асосланиб, ДПС ходимлари ҳайдовчидан айнан ҳужжатнинг оригиналини талаб қилишга ҳақли эканлигини эслатади. Ҳужжатларнинг йўқлиги ёки уларни тақдим этишдан бош тортиш маъмурий жавобгарликка сабаб бўлиши мумкин.