Ўзбекистон Республикасининг Япониядаги Элчихонаси 17 февраль 2021й. Япониянинг йирик буддавийлик ташкилоти “Rissho Kosei-kai” раиси Кейджи Кунитоми ва ташкилот таркибидаги Илмий тадқиқот институти директори Осаму Айнотани билан учрашув ўтказди.

Учрашувда “Rissho Kosei-kai” вакилларининг жорий йилда Ўзбекистонга сафарини ташкил қилиш, юртимизнинг иқтисослашган ташкилотлари билан хамкорлик алоқаларини йўлга қўйиш масалалари муҳокама қилинди.

Учрашув иштирокчилари Ўзбекистоннинг жанубида буддизмнинг тарқалиш тарихи, япониялик олимлар билан олиб борилган археологик тадқиқотлар, Кюдзо Катонинг буддизм тарихини ўрганиш бўйича Сурхондарё вилоятида олиб боган фаолияти, ҳамда юртимизда олиб борилаётган кенг ислоҳотлар ва яратилаётган шарт-шароитлар ҳақида батафсил таништирилди.

К.Кунитоми Ўзбекистоннинг бой тарихи ва туризм салоҳиятига катта қизиқиш билдириб, элчихона томонидан илгари сурилган таклифларни кўриб чиқиб ўзаро манфаатли ҳамкорликни йўлга қўйиш истагини билдирди.

Шу билан бирга, коронавирус билан боғлиқ вазият яхшиланиши билан Ўзбекистонга ташриф буюриш масаласини ўрганиб чиқиш ниятида эканлигини таъкидлаб ўтди.

Учрашув якунида муҳокама қилинган масалалар бўйича биргаликда иш давом эттириш тўғрисида келишиб олинди.