Тошкент, Ўзбекистон (UzDaily.uz) — Суғурта дастури Eats, Lavka ва Delivery хизматлари билан ҳамкорлик қилувчи курьерларга қўлланади ҳамда буюртмаларни бажариш давомида юзага келган меҳнатга қобилиятсизликнинг айрим ҳолатларини қоплаб беради.

Ҳозирги пайтда Yandex Go иловасидаги Eats ва Lavka хизматларида ушбу суғурта дастури ишламоқда. Яқин кунларда унга Delivery хизмати ҳам қўшилади. Суғурта пиёда ҳаракатланувчи, автомобиллардан, велосипедлардан, самокатлардан, мопедлардан ёки бошқа шахсий ҳаракатланиш воситаларидан фойдаланувчи курьерларга татбиқ этилади.

Барча хизматлар фаолият юритаётган шаҳарларда курьерлар учун суғурта бепул тақдим этилади. У иш вақти бошланган вақтдан бошлаб амал қилади ва буюртмани бажариш жараёнида соғлиқ билан боғлиқ муаммолар сабаб меҳнат қобилиятини йўқотиш ҳолатларини қоплайди. Суғурта қопламаси шартларига қараб, турли истиснолар назарда тутилган, жумладан, зарар қасддан, алкоголь ёки наркотик моддалар таъсирида етказилган ҳолатларда амал қилмайди.

Компенсация олиш учун суғурта компаниясига маълумотларни тақдим этиш талаб қилинади, шундан сўнг барча зарур жараёнлар ўтказилиб, товон пули тўланади. Суғурта қоплами миқдори, суғурта ҳолати ва шартларига боғлиқ равишда, 100 миллион сўмгача бўлиши мумкин.