Кеча «Ўзавтосаноат» акциядорлик жамияти ва Хитойнинг «Build Your Dreams» компанияси раҳбарияти ўртасида Англашув меморандуми имзоланди, деб хабар бермоқда “Дунё” АА.

Мамлакатимизнинг Хитойдаги элчихонаси ва Ўзбекистон Инвестициялар ва ташқи савдо вазирлигининг Пекиндаги ваколатхонаси ташаббуси билан йўлга қўйилган ҳамкорлик алоқаларининг илк натижаси ўлароқ, томонлар Ўзбекистонда электробуслар ва уларни маҳаллийлаштирилиши учун эҳтиёт қисмлари ишлаб чиқариш лойиҳасини биргаликда ўрганиб чиқишга келишиб олди.

Таъкидлаш керакки, 1995 йилда Шэньчжэнь шаҳрида ташкил этилган “Build Your Dreams” (BYD) компанияси Хитойнинг энг йирик автомобилсозлик, ярим ўтказгичлар, электротехника ва қуёш панеллари ишлаб чиқаришга ихтисослашган компанияси ҳисобланади.

90 миллиард евродан ортиқ умумий капиталга ва Хитойдан ташқари АҚШ, Бразилия, Венгрия, Канада, Мексика, Нидерландия, Япония ва Ҳиндистонда ишлаб чиқариш заводларига эга бўлган ушбу компанияда 220 минг нафарга яқин ходимлар доимий меҳнат фаолиятини олиб боради.