Тошкент, Ўзбекистон (UzDaily.uz) — Доҳа шаҳри (Қатар)да "Web Summit Qatar 2025" халқаро IТ-конференциясида Рақамли технологиялар вазирлиги вакиллари иштирок этди. Саммит доирасида вазир ўринбосари Рустам Каримжонов, MEEZA компанияси бош директори Муҳаммад Али Ал-Ғайтаний ва UZINFOCOM бизнесни ривожлантириш директори Бахтиёр Ризаев ўртасида ўзаро англашув меморандуми имзоланди.

MEEZA – Қатардаги етакчи IТ-хизматлар ва ечимлар етказиб берувчиси бўлиб, инфратузилмани бошқариш, булутли хизматлар, маълумотларни қайта ишлаш марказлари учун ечимлар ва киберхавфсизлик каби кенг қамровли хизматларни таклиф этади. Компания молия, соғлиқни сақлаш, давлат бошқаруви ва нефть-газ саноати каби турли соҳаларга хизмат кўрсатади. MEEZA очиқ акциядорлик жамияти бўлиб, унинг бозор капитализацияси 0,5 миллиард АҚШ долларидан ошади.

Ҳамкорлик Қатар ва Ўзбекистон ўртасида IТ-таълим, рақамли технологиялар ва бизнес жараёнлари аутсорсингини ривожлантиришга қаратилган. Томонлар таълим дастурларини ишлаб чиқадилар, инновацион ечимларни жорий этадилар ва аутсорсинг учун имкониятлар яратадилар, бу эса иқтисодий ўсиш ва узоқ муддатли ҳамкорликка ҳисса қўшади.

Келгусида Рақамли технологиялар вазирлиги, UZINFOCOM ва MEEZA барча ташаббусларнинг узлуксиз амалга оширилишини таъминлаш учун биргаликда амалга ошириш тизимини яратади.