Тошкент, Ўзбекистон (UzDaily.uz) — Тошкентда Учтепа тумани ҳокими ёрдамчиси, тадбиркорликни ривожлантириш, иш билан таъминлаш ва камбағалликни қисқартириш учун масъул шахс қўлга олинди, деб хабар бермоқда UzA.

Мазкур мансабдор шахс 210 квадрат метр майдонда тўртта дўкон қурилиши учун мўлжалланган ер участкаси аукционида ғалаба қозонишни кафолатлаш эвазига $30 минг талаб қилган вақтда қўлга тушган.

У ерни ўз номига расмийлаштириш ниятида бўлганини ва аукцион натижаларига «катта лавозимли алоқалари» орқали таъсир кўрсатиши мумкинлигини айтган. Текширув давомида унинг ушбу даъволари ҳақиқатга мос келиши ёки келмаслиги ўрганилади.

Қўлга олинган шахсга нисбатан Ўзбекистон Республикаси Жиноят кодексининг 168-моддаси 4-қисми («Жуда катта миқдордаги фирибгарлик») бўйича жиноят иши қўзғатилди. У 10 йилгача озодликдан маҳрум қилиниши мумкин.

Эътиборга лойиқ жиҳати, ушбу шахс олдин ҳам уч марта жиноий жавобгарликка — ўғирлик, фирибгарлик ва мансаб ваколатини суиистеъмол қилиш учун тортилиши маълум қилинган.