Тошкент, Ўзбекистон (UzDaily.uz) — Туркия ҳукумати аввал хориж фуқаролари муайян жарималарни тўлаш ёки керакли расмий тартибларни бажарган ҳолда мамлакатга тезда қайтиш имконини берган «шартли кириш» (şartlı giriş) механизмини бекор қилди.

Янги тартиб 2025 йил февраль ойи бошидан кучга кирди. Шу муносабат билан охирги икки ҳафта ичида Туркия аэропортларида 150 дан ортиқ хорижий фуқаро, жумладан ўзбекистонликлар муаммоларга дуч келди.

Аввалроқ Туркияда қолиш муддати ошириб юборилган ёки яшаш учун рухсатнома (ikamet izni) олишдан бош тортилган хориж фуқаролари «шартли кириш» ҳуқуқидан фойдаланиши мумкин эди. Бу механизм уларга тезда мамлакатга қайтиш ва 10 кун ичида ҳужжатларни расмийлаштириш имкониятини берган.

Янги қоидаларга кўра, энди бу каби қоидаларни бузган шахсларга, фуқаролигига боғлиқ ҳолда, Туркияга кириш 3-6 ойга тақиқланиши мумкин.

Ўзбекистоннинг Истанбулдаги Бош консулхонаси Туркияга сафар қилишни режалаштираётган ўзбекистонликларни олдиндан миграция талаблари билан танишиб чиқиш ва барча зарур ҳужжатларга эга бўлиш кераклиги ҳақида огоҳлантирди.

Шунингдек, ВНЖ олишдан бош тортилган фуқароларни мамлакатни қонунга мувофиқ тарк этишга чақирди, чунки ушбу қоидаларга риоя қилинмаслиги уларнинг кейинчалик Туркияга кириш имкониятига таъсир кўрсатиши мумкин.