Тошкент, Ўзбекистон (UzDaily.uz) — Туркиянинг Ўзбекистондаги элчиси Олган Бекар Ўзбекистон халқини яқинлашиб келаётган Янги йил билан табриклади.

2025 йил сизга соғлик, тинчлик-хотиржамлик, қут-барака, фаровонлик ва бахт-омад келтиришини, Туркия ва Ўзбекистон ўртасидаги муносабатлар Янги йилда янада мустаҳкамланишини тилайман.

Туркия Президенти жаноб Ражаб Тоййиб Эрдўған ва Президент Шавкат Мирзиёев ўртасидаги самимий дўстлик ва мулоқот туфайли муносабатларимиз ўз тарихидаги энг яхши даврига эришди.

2024 йил икки томонлама муносабатларимиз учун жуда самарали ва унутилмас йил бўлди. Жорий йилнинг июнь ойида Олий даражадаги стратегик ҳамкорлик кенгашининг (ЙДСК) ИИИ. йиғилишига Анқарада мезбонлик қилдик. Биз Ўзбекистон Президенти жаноб Мирзиёевни ва Вазирлар Маҳкамаси аъзоларини мамлакатимизда кутиб олдик. Ташриф давомида 18 та шартнома имзоланиб, кейинги давр учун ёл харитаси белгилаб олинди.

Қардошлик ришталарига асосланган стратегик ҳамкорлигимизни муносабатларимизга ярашадиган тарзда ҳар соҳада ривожлантирмоқдамиз. Таълим, маданият, санъат, туризм, қишлоқ хўжалиги, энергетика, хавфсизлик ва бошқа кўплаб соҳаларда биргаликдаги саъй-ҳаракатларимизни давом эттирмоқдамиз. Ўзбекистонга турк сармояларини кўпайтириш, ўзаро савдо ҳажмида ўз олдимизга қўйган муштарак мақсадларга эришиш ва халқларимиз фаровонлигини ошириш йўлида тинмай меҳнат қилмоқдамиз.

Икки томонлама алоқаларимиздан ташқари Туркий Давлатлар Ташкилоти каби халқаро ташкилотлар доирасида ҳам ҳамкорликни мустаҳкамлаб, Турк дунёсининг интеграцияси ва бирлиги йўлида муштарак қадамлар ташламоқдамиз.

Биз, Туркия давлати сифатида Президент жаноб Мирзиёев бошчилигидаги ислоҳотлар ва тараққиёт жараёнини ҳамиша бор имкониятларимиз билан қўллаб-қувватлаб келмоқдамиз; Биз Ўзбекистоннинг халқаро миқёсдаги обрў-эътибори ортиб бораётганини ва минтақавий тараққиётга қаратилган фаолиятларини мамнуният билан кузатиб бормоқдамиз.

2025 йилда турк ва ўзбек халқларининг тинчлиги, барқарорлиги ва фаровонлиги янада ортишини; Туркия-Ўзбекистон ҳамкорлиги чуқур илдиз отиб, гуллаб-яшнашини; Турк дунёси халқаро майдонда муносиб ўрнига эришишини, бутун дунёда содир бўлаётган ёвузлик ва адолатсизликлар тинч йўл билан якун топишини тилаган ҳолда, барчангизни Янги йил билан самимий табриклайман.

Янги йилингиз муборак бўлсин!