Тошкент, Ўзбекистон (UzDaily.uz) — АҚШ Президенти Дональд Трамп БРИКС сиёсатини қўллаб-қувватловчи давлатларга нисбатан қўшимча тарифлар жорий этилиши мумкинлиги ҳақида баёнот берди, деб хабар беради Deutsche Welle.

Бу баёнот БРИКС саммити якунида Рио-де-Жанейрода қабул қилинган декларацияда "якка томонлама тариф ва нотариф чоралар" танқид қилингани ортидан янгради.

«БРИКСнинг антиамериканча сиёсатини қўллаб-қувватлаган ҳар қандай давлатга 10% миқдорида қўшимча бож жорий этилади. Бу сиёсатда ҳеч қандай истиснолар бўлмайди», — деб ёзди Трамп Truth Social ижтимоий тармоғида.

БРИКС декларациясида АҚШ ёки шахсан Трамп тилга олинмаган бўлса-да, AFP агентлиги ушбу ҳужжатни «Оқ уйга қарата юборилган очиқ сиёсий сигнал» сифатида баҳолади.

БРИКС ҳужжатида «якка томонлама чекловлардан жиддий ташвиш» билдирилган бўлиб, саммит иштирокчилари бундай чоралар Жаҳон савдо ташкилоти қоидаларига зид, глобал етказиб бериш занжирларини бузувчи ва иқтисодий номутаносибликни кучайтирувчи омил сифатида баҳолади.

Шу пайтда АҚШ молия вазири Скотт Бессент 1 августдан бошлаб бож тўловларини қайта тиклаш режалаштирилаётганини тасдиқлади. Бу — аввалроқ Трамп томонидан апрель ойида вақтинча тўхтатилган тарифлардир.

Бож ставкасининг асосий миқдори 10% бўлиши кутилаётган бўлса-да, айрим давлатлар учун бу кўрсаткич анча юқори бўлиши мумкин.

Эслатиб ўтамиз, 2024 йил охирида ҳам Трамп БРИКС томонидан долларга муқобил ўз валютаси яратилиши мумкинлиги ҳақидаги ғояга жавобан 100% бож солиқлари билан таҳдид қилган эди. У шунда шундай деган:

«Долларни алмаштиришга уринаётган ҳар қандай давлат Америка бозори билан хайрлашишга тайёр бўлиши керак».

БРИКС ўз валютасини яратиш ғояси аввалроқ Россия Президенти Владимир Путин томонидан илгари сурилган эди, аммо кейинчалик у бу ташаббусга аъзо давлатлар ҳали тайёр эмаслигини тан олган.

Айни вақтда БРИКС таркибига Бразилия, Россия, Ҳиндистон, Хитой, Жанубий Африка, шунингдек, 2024 йилда қўшилган Эрон, Миср, Эфиопия, БАА ва Индонезия киради. Блок мамлакатларининг жами аҳолиси дунё аҳолисининг ярмини, уларнинг улуши эса жаҳон ЯИМнинг 40% га яқин қисмини ташкил қилади.