Тошкент, Ўзбекистон (UzDaily.uz) — Тошкент шаҳрида Call-марказ орқали фуқароларнинг шахсий маълумотларини ноқонуний равишда қўлга киритиб, уларнинг банк карталаридан пул ўғирлаган жиноий гуруҳнинг фаолияти тўхтатилди.

Пойтахт ИИББ маълумотига кўра, фирибгарлар республиканинг турли ҳудудларидаги фуқароларга қўнғироқ қилиб, ўзларини мобил алоқа компаниялари ходимлари сифатида таништирган. Улар турли баҳоналар билан фуқароларни SMS-кодни айттиришга ишонтирган. Ушбу код эса аслида банк карталарига кириш имконини берган ва фирибгарларга жабрланувчилар ҳисобларидан маблағларни ечиб олишга имкон яратган.

Мирзо-Улуғбек туманида ўтказилган махсус операция натижасида 20 га яқин шахс қўлга олинди. Уларнинг яшаш манзилларида ўтказилган тинтувлар давомида 15 мингдан ортиқ шахсий маълумотлар базаси, пластик карталар, кибержиноятларда фойдаланилган ускуналар ва гиёҳванд моддалар мусодара қилинди.

Ҳозирда мазкур ҳолат бўйича жиноий иш қўзғатилган. Тергов ишлари давом этмоқда, жиноий схеманинг барча тафсилотлари, жабрланувчилар сони ва етказилган зарар миқдори аниқланмоқда.