Тошкент, Ўзбекистон (UzDaily.uz) — Ижтимоий ҳимоя миллий агентлиги ҳамда Турк ҳамкорлик ва мувофиқлаштириш агентлиги (ТIKА) ўртасида жорий йилнинг 8 февраль санасида тузилган шартномага асосан Фарғона шаҳридаги ногиронлиги бўлган болалар учун "Мурувват" интернат уйига 67 турдаги замонавий реабилитация жиҳозлари топширилди. Бу ҳақда Ўзбекистон Миллий ижтимоий ҳимоя агентлиги хабар берди.

Умумий қиймати 110 минг АҚШ долларини ташкил қилувчи мазкур жиҳозлар болаларнинг муолажа ва таълим олиш шароитларини янада яхшилаш имконини бериши билан аҳамиятлидир.

ТIKА нинг Ўзбекистондаги ваколатхонаси раҳбари Али Рıза Тезжан билан ўзаро ишонч ва самимий руҳда кечган суҳбат давомида халқаро ҳамкорликка оид истиқболдаги лойиҳалар ҳақида сўз борди. Шу куни меҳмонлар муассасада яшовчи болаларнинг байрам тадбиридаги қувончларига шерик бўлишди. Икки биродар халқнинг санъати, урф-одатлари, орзу-истаклари муштарак экани намоён бўлди.

2024 йил бошидан буён ушбу муассасада 11 нафар бола мустақил ҳаракатланиш ва ўзига хизмат кўрсатиш кўникмаларига эга бўлди ҳамда оиласи бағрига қайтарилди.