Нашрнинг таъкидлашича, Ўзбекистонда Буюк Ипак йўлининг 3 та энг муҳим - Хива, Бухоро ва Самарқанд шаҳарлари жойлашган.

Нашрнинг қайд этишича, мазкур шаҳарлар савдогарларнинг тўхташлари учун муҳим шаҳарлар эди. Ҳозирда ўша даврнинг барча ёдгорликлари қайта таъмирдан чиқарилган.

“The Telegraph” нашри Ўзбекистон пойтахти Тошкент тўғрисида ҳам сўз юритади. Жумладан, 1966-йили бўлган кучли зилзилада Тошкент деярли тўлиқ бузилгани, аммо тезда яна ўзини тиклаб олиб, қайтадан қурилгани қайд этилган.

Хива – очиқ осмон остидаги шаҳар-музей ҳисобланиб, ЮНЕСКО томонидан ҳимояга олинган. Нашрнинг қайд этишича, шаҳар 6-асрда ташкил этилган бўлиб, Буюк Ипак йўлининг савдо шаҳри сифатида гуллаб-яшнаган.

“The Telegraph”нинг таъкидлашича, Ўзбекистон сайёҳлар учун хавфсиз мамлакат ҳисобланади. Шунингдек, Ўзбекистон савдо-сотиқни амалга ошириш учун ҳам қулайдир. Бу ерда сайёҳлар қўлда ясалган керамик идишларни, заргарлик ишларини, ипак материалларини ва миниатюраларни атиги бир неча долларга сотиб олишлари мумкин.

Мақола муаллифи сайёҳларга албатта лағмон ва норин, шунингдек жиз таомидан татиб кўришни маслаҳат беради. Ҳар бир ҳудуд энг яхши палов мақомини олиш учун курашади, аммо ҳақиқатда ҳамма жойда паловнинг таъми бир, таъкидлайди нашр.