Тошкент, Ўзбекистон (UzDaily.uz) — Инвестициялар, саноат ва савдо вазири Н. Холмуродов бошчилигидаги «Ўзчармсаноат» уюшмаси делегацияси Хитойда бўлиб турибди. Ўзбекистон делегацияси Хитойнинг Tata Shoes Group компанияси раҳбарияти билан музокаралар ўтказди.

Tata Shoes Group Ўзбекистон билан ҳамкорлик қилаётган энг фаол хорижий инвесторлардан бири ҳисобланади. Компания шу кунгача мамлакат чарм-пойабзал саноатига 20 миллион доллардан ортиқ инвестиция йўналтирган. Ушбу сармоя орқали ишлаб чиқариш қувватлари кенгайтирилди, янги иш ўринлари яратилди ва экспорт имкониятлари оширилди.

Музокаралар давомида компания раҳбарияти Ўзбекистон ва Марказий Осиё бозорида олиб борилган таҳлиллар натижаларини тақдим этди. Аниқланишича, ҳудудда айниқса аёллар пойабзалига талаб юқори. Шу боис компания Ўзбекистонда яна 10 миллион долларлик қўшимча инвестиция киритишни режалаштирмоқда.

Компания вакиллари янги инвестиция дастури доирасида ишлаб чиқариш турини кенгайтиришни ҳам мақсад қилган. Келгусида эркаклар, болалар ва махсус пойабзалларни ишлаб чиқариш йўлга қўйилиши кўзда тутилган. Бу ташаббус нафақат ички бозорни, балки экспорт салоҳиятини ҳам мустаҳкамлашга хизмат қилади.

Tata Shoes Group билан олиб борилаётган музокаралар Ўзбекистон чарм-пойабзал саноатида янги босқични бошлаб бериши мумкин. Компаниянинг навбатдаги сармоя лойиҳалари минтақада кенг талаб қилинаётган маҳсулотларни ишлаб чиқаришга хизмат қилиб, юзлаб янги иш ўринларини яратади ва мамлакатнинг экспорт имкониятларини янада кенгайтиради.