Тошкент, Ўзбекистон (UzDaily.uz) — 2025 йил 23 июль куни Фармацевтика тармоғини ривожлантириш агентлиги директори Абдулла Азизов ва Хитой Халқ Республикасининг йирик фармацевтика ва саноат компаниялари вакилларидан иборат делегация билан учрашув бўлиб ўтди. Делегацияга Хитойнинг Ўзбекистондаги Савдо палатаси раиси Лю Юй бошчилик қилди.

Учрашув чоғида Хитойлик меҳмонларга "Tashkent Pharma Park” инновацион илмий-ишлаб чиқариш фармацевтика кластери лойиҳаси, унинг инфратузилмавий имкониятлари, сармоядорлар учун яратилган қулай шарт-шароитлар ва давлат томонидан кўрсатиладиган қўллаб-қувватлаш чоралари ҳақида батафсил маълумот берилди.

Мулоқот давомида онкология, кардиология, косметика ва бошқа истиқболли йўналишларда маҳаллий ишлаб чиқаришни йўлга қўйиш масалалари муҳокама қилинди. Шунингдек, Хитойнинг 60 га яқин етакчи фармацевтика компаниялари иштирокида онлайн мулоқот ташкил этиш, экспорт-импорт кўрсаткичлари бўйича маълумот алмашиш ва ҳамкорлик йўналишларини белгилаш таклифи илгари сурилди.

Учрашув якунлари бўйича томонлар ахборот алмашинуви ва ишчи мулоқотни давом эттириш, сармоявий ҳамкорлик юзасидан амалий қадамларни белгилашга келишиб олдилар.