Тошкент, Ўзбекистон (UzDaily.uz) — 18 апрель куни Самарқандда Марказий Осиё давлатлари Хавфсизлик кенгашлари котибларининг иккинчи учрашуви бўлиб ўтди. Учрашув доирасида минтақавий хавфсизликни таъминлаш, терроризм, экстремизм, радикаллашув ва трансмиллий уюшган жиноятчиликка қарши курашиш ҳамда, Марказий Осиёнинг экологик ва транспорт хавфсизлигини таъминлаш бўйича ҳамкорлик масалалари кўриб чиқилди.

Тадбир давомида СМТИ директори Элдор Арипов йиғилиш иштирокчиларига Ўзбекистон Республикаси Президентининг 2024 йил 9 август куни Остона шаҳрида бўлиб ўтган Марказий Осиё давлатлари раҳбарларининг олтинчи Маслаҳат учрашувида билдирилган ташаббусини амалга ошириш доирасида тайёрланган Марказий Осиёда минтақавий хавфсизлик ва барқарорлик концепцияси лойиҳасини тақдим этди.

Концепцияни ишлаб чиқиш ва қабул қилишнинг долзарблиги ҳақида сўз юритар экан, Элдор Арипов жаҳонда шиддат билан ўзгариб бораётган геосиёсий ва геоиқтисодий вазият шароитида Марказий Осиёда хавфсизлик, барқарорлик ва изчил тараққиётни таъминлаш масалалари бўйича ягона қараш ва ёндашувларни шакллантириш талаб этилаётганини таъкидлади.

Унинг сўзларига кўра, бугунги кунда минтақа ўз тараққиётининг сифат жиҳатидан янги босқичига қадам қўйган. Умумий манфаатдорлик ва биргаликдаги саъй-ҳаракатлар туфайли бу ерда янги муҳит шаклланди, бу эса кўп томонлама ҳамкорлик жараёнларига ортга қайтмас ва изчил тус берди.

Шу ўринда, ички ва ташқи таҳдидлар ҳамда хавф-хатарларга қарши хавфсизлик ва барқарорликни таъминлаш Марказий Осиё давлатларининг барқарор ривожланиш суръатларини юқори даражада сақлаб қолишнинг энг муҳим шарти ҳисобланади.

Ҳамкорликка очиқлик, учинчи томон манфаатларига қарши йўналтирилмаганлиги тақдим этилган Концепциянинг ўзига хос хусусиятлари сифатида СМТИ директори томонидан алоҳида қайт этилди.

Бундан ташқари, ҳужжат лойиҳасида минтақавий хавфсизлик кўп қиррали табиатга эга эканлиги, замонавий чақириқ ва таҳдидларга комплекс ёндашув ва биргаликда курашишни талаб этиши ҳамда барқарор ривожланиш билан узвий боғлиқлиги алоҳида қайд этилган.