Тошкент, Ўзбекистон (UzDaily.uz) — «Ўзатом» Агентлиги делегацияси директор Азим Ахмедхаджаев бошчилигида Хитой Халқ Республикасига ишчи ташрифини бошлади.

22-25 апрель кунлари Ўзбекистон Республикаси Вазирлар Маҳкамаси ҳузуридаги Атом энергияси агентлиги делегацияси директор Азим Аҳмедхаджаев бошчилигида Хитойда ишчи ташриф билан бўлиб турибди. Ташриф атом энергетикаси соҳасида халқаро ҳамкорликни мустаҳкамлаш ва Ўзбекистонда атом электр станцияси (АES) қурилиши лойиҳасини амалга оширишнинг асосий жиҳатларини муҳокама қилишга қаратилган.

Жорий йил 22 апрель куни Хитой Миллий Ядро Корпорацияси (CNNC)нинг хорижий лойиҳалар учун масъул бўлган бўлими  CNOS офисида Ўзатом Агентлиги, «Росатом» Давлат Корпорацияси ва Shanghai Electric компанияси вакиллари иштирокида уч томонлама учрашув бўлиб ўтди.

Учрашувнинг асосий мақсади Shanghai Electric компаниясининг турбина жиҳозлари ишлаб чиқариш имкониятларини ўрганиш ва ушбу жиҳозларни Ўзбекистонда АES лойиҳаси талабларига мослаштириш истиқболларини баҳолашдан иборат бўлди.

Музокаралар давомида томонлар АESнинг ядровий бўлмаган ороли учун жиҳозларни ишлаб чиқиш, ишлаб чиқариш ва етказиб бериш билан боғлиқ масалаларни муҳокама қилдилар. Муҳокама лойиҳани амалга ошириш учун зарур бўлган технологик жиҳозларнинг хусусиятлари каби кенг кўламли техник жиҳатларни қамраб олди.

Учрашув давомида Хитой томони «Ўзатом», «Росатом» ва CNNC ўртасида уч томонлама шартнома тузиш имкониятини кўриб чиқиш ташаббуси билан чиқди. Ушбу ҳужжат CNNCнинг Ўзбекистонда АES қурилиши лойиҳасидаги роль ва масъулиятини аниқ белгилашга хизмат қилади, бу эса лойиҳа ривожланиши учун муҳим қадам бўлади.

Ўзбекистонда атом электр станцияси қурилиши мамлакатнинг энергетик хавфсизлигини таъминлаш ва барқарор ривожланишга эришишга қаратилган стратегик аҳамиятга эга лойиҳадир. «Ўзатом» Агентлиги халқаро ҳамкорлар билан биргаликда лойиҳани амалга ошириш устида фаол ишламоқда, замонавий технологияларни жорий этиш ва ишончли жиҳоз етказиб берувчилар билан ҳамкорликка алоҳида эътибор қаратмоқда.

Shanghai Electric — атом ва иссиқлик электр станциялари учун энергетика ва турбина жиҳозлари ишлаб чиқарувчи Хитойнинг етакчи компанияларидан биридир. Компания катта тажрибага эга бўлиб, 39 та АES учун ядровий бўлмаган орол жиҳозларини етказиб берган, жумладан, Хитойда 37 та ва Покистонда 2 та объект. Shanghai Electric ассортиментида қуввати 50 дан 1240 МВт гача бўлган турбогенераторлар мавжуд.