Тошкент, Ўзбекистон (UzDaily.uz) — Qanot Sharq авиакомпанияси «Тошкент – Шанхай» йўналиши бўйича илк тўғридан-тўғри парвозни муваффақиятли амалга оширди. Бу икки стратегик муҳим мегаполис — Ўзбекистон ва Хитой шаҳарлари ўртасида мунтазам ҳаво қатновининг бошланиши бўлди.

Рейслар ҳафтасига икки марта — душанба ва пайшанба кунлари амалга оширилади. Бу мамлакатлар ўртасида транспорт оқимларини жадаллаштириш, логистика жараёнларини соддалаштириш ва савдо-иқтисодий алоқаларни мустаҳкамлаш имконини беради.

Тошкент ва Шанхай ўртасида тўғридан-тўғри парвозлар инвестициявий ҳамкорликни кенгайтириш, туристик алмашинувни фаоллаштириш ва маданий алоқаларни мустаҳкамлашда янги имкониятларни очади.

Ушбу янги ҳаво қатнови бизнес доиралар ўртасидаги ҳамкорликни енгиллаштиради, тижорат юкларининг тез етказиб берилишини таъминлайди ва икки томонлама савдо учун қўшимча рағбат сифатида хизмат қилади.