Тошкент, Ўзбекистон (UzDaily.uz) — «Ўзелтехсаноат» уюшмаси раиси Мирзиёд Юнусов Франциянинг “Sergi Transformer Protector” компанияси бизнесни ривожлантириш масалалари бўйича бошқарувчиси Канимет Тоҳлуков билан ҳамкорлик истиқболларини муҳокама қилди.

“Sergi Transformer Protector” компанияси энергетика соҳасида фаолият юритувчи етакчи компаниялардан бири бўлиб, электр трансформаторларини ҳимоя қилиш бўйича инновацион ечимлар ишлаб чиқади.

Компания бутун дунё бўйлаб турли энергетика тармоқлари билан ҳамкорлик қилиб, хавфсизлик ва самарадорликни оширишга йўналтирилган маҳсулотларни таклиф этади.

Музокаралар чоғида Ўзбекистон электротехника саноатининг ривожланиши, хорижий инвесторларга яратилган имкониятлар ва истиқболли ҳамкорлик йўналишлари муҳокама қилинди.

Уюшма раиси мамлакатимиз электротехника соҳасига оид маълумотлар тақдим этиб, ўзаро манфаатли лойиҳалар бўйича ҳамкорлик таклифларини билдирди.

Мазкур тадбир икки давлат ўртасидаги иқтисодий алоқаларни мустаҳкамлаш ва Ўзбекистон саноатининг халқаро бозорда ўрнини янада кенгайтиришга хизмат қилиши кутилмоқда.