Тошкент, Ўзбекистон (UzDaily.uz) — Ўзбекистон Божхона қўмитаси, Давлат хавфсизлик хизмати ва ички ишлар органлари ходимлари мамлакатга ноқонуний йўл билан олиб кирилмоқчи бўлган 45 кг кучли таъсир қилувчи прегабалин моддасини мусодара қилди. Бу ҳақда Ўзбекистон Божхона қўмитаси матбуот котиби Хусан Тангриев маълум қилди.

Унинг сўзларига кўра, «Дўстлик» божхона постидан доимий равишда шахсий эҳтиёж учун маҳсулот олиб ўтаётганини баҳона қилиб келган уч нафар фуқаро бу сафар наркотик модда контрабандасига аралашган. Улар 9 кг оғирликдаги Ariel кир ювиш кукуни қутиларида прегабалин моддасини олиб ўтишга уринган.

Оператив ҳаракатлар давом эттирилиб, Ахангаран туманида яна бир гумонланувчи қўлга олинди. Унинг ёнидан 27 кг оғирликдаги тўққизта кир ювиш кукуни қутилари топилди. Уларнинг ичида ҳам кучли таъсир қилувчи моддалар бўлган.

Тергов ҳаракатлари Учтепа туманига олиб борди ва у ерда бир уйдан ноқонуний нарколаборатория, наркотик моддалар хомашёсини қайта ишлаш учун ишлатиладиган бўш капсулалар ва ускуналар аниқланди.

Орадан бир кун ўтиб, ушбу лаборатория учун мўлжалланган яна 20 кг прегабалин маҳсулоти, кир ювиш кукуни қутиларида олиб кирилмоқчи бўлган ҳолда, қўлга олинди. Жами 16 та қутидан иборат партиянинг умумий оғирлиги 56 кгни ташкил қилди. Экспертиза хулосасига кўра, шундан 45 кг — прегабалин эканлиги аниқланди.

Маълумотларга кўра, 1 кг прегабалиндан 33 мингта капсула тайёрлаш мумкин бўлиб, бу 1,5 миллионга яқин капсула ишлаб чиқариш имконини берган бўлар эди. Бундай миқдордаги модда одамлар саломатлигига жиддий хавф солиши ва турли жиноятларга сабаб бўлиши мумкин эди.

Мусодара қилинган партиянинг тахминий бозор қиймати 40 миллиард сўмни ташкил этади. Ҳодиса юзасидан жиноят иши қўзғатилган.

Жорий йил бошидан буён Ўзбекистон божхона органлари томонидан 90 кг га яқин кучли таъсир қилувчи моддаларнинг ноқонуний олиб кирилиши ва айланмасига оид 86 та ҳолатнинг олди олинган.