Тошкент, Ўзбекистон (UzDaily.uz) — Ўзбекистон ва Қирғизистон маҳкум бўлган фуқароларни ўзаро алмашиш бўйича келишувга эришди. Бу шартнома 31 январда Ўзбекистон Олий Мажлиси Қонунчилик палатасининг йиғилишида қабул қилинган Қонун билан ратификация қилинди.

Ҳужжат эндиликда Сенатга тасдиқлаш учун юборилди. Илгари бу қонун Қирғизистон Жогорку Кенеши томонидан маъқулланган эди.

Маҳкумларни жазони ватанида ўташини таъминлаш бўйича келишув 2024 йил 18 июлда Қирғизистон президенти Садир Жапаровнинг Тошкентга ташрифи доирасида имзоланган.

Қирғизистон бош прокурори ўринбосари Умуткан Конкубаева маълумотига кўра, ҳозирда Ўзбекистон қамоқхоналарида 42 қирғизистонлик жазо ўтамоқда, Қирғизистон қамоқхоналарида эса 97 нафар ўзбекистонлик маҳкум сақланмоқда. Аммо, Ўзбекистон Экологик партияси раҳбари Абдушукур Ҳамзаев бошқа рақамларни келтирди: унга кўра, 45 қирғизистонлик ва 96 ўзбекистонлик маҳкум бор.

Ўзбекистон парламенти Қонунчилик палатаси аъзоси Қозимжон Тожиевнинг тушунтиришича, маҳкумларнинг алмашинуви Ўзбекистон-Қирғизистон чегарасидаги «Дўстлик»/«Достук» назорат-ўтказиш пункти орқали амалга оширилади.

Ҳужжат шунингдек, маҳкумларни топшириш харажатларини қоплаш, баҳсларни ҳал этиш механизмлари, расмий мулоқот тиллари ва бошқа муҳим масалаларни тартибга солади. Келишув ижроси учун Ўзбекистон ва Қирғизистон бош прокуратуралари масъул бўлади.

Депутатлар таъкидлашича, бу келишув маҳкумларни ижтимоий реабилитация қилиш, уларнинг оилавий алоқаларини сақлаб қолиш ва икки давлат ўртасидаги ҳамкорликни мустаҳкамлашга хизмат қилади.