Тошкент, Ўзбекистон (UzDaily.uz) — Ўзбекистон Республикаси транспорт вазири Илҳом Махкамов Корея Республикасининг Ўзбекистондаги Фавқулодда ва Мухтор Элчиси Вон До Ён ва Корея Эксимбанкининг Тошкентдаги ваколатхонаси раҳбари Сангжин Канг билан музокаралар ўтказди.

Учрашувда томонлар транспорт соҳасидаги ҳамкорликнинг ҳозирги ҳолати ва истиқболларини муҳокама қилдилар. Айниқса, Ўзбекистон ва Корея Республикаси ўртасида мунтазам авиақатновлар сонини кўпайтириш масалаларига алоҳида эътибор қаратилди.

Транспорт вазири Корея томонига автомобиль йўлларини қайта қуриш ва янги йўллар барпо этишга доир инфратузилма лойиҳаларини тақдим этиб, ушбу лойиҳаларни амалга оширишда кореялик компанияларнинг иштирок этиш имкониятларини кўриб чиқишни таклиф этди.

Корея Эксимбанкининг ваколатхонаси раҳбари Hyundai Rotem компанияси томонидан «Ўзбекистон темир йўллари» АЖ учун олти электрпоезд етказиб бериш лойиҳаси ижроси борасидаги ишлар ҳақида маълумот берди ва банкнинг Ўзбекистондаги бошқа транспорт ташаббусларини молиялаштиришга қизиқишини тасдиқлади.

Корея элчиси Вон До Ён Ўзбекистоннинг Корея Республикаси учун стратегик аҳамиятга эга муҳим ҳамкор эканини, айниқса, транспорт соҳасидаги алоқалардаги аҳамиятли ролини таъкидлади.

Учрашув якунида кореялик ҳамкорлар Ўзбекистон Транспорт вазирлиги вакилларини жорий йилнинг иккинчи ярмида ўтказиладиган Корея-Марказий Осиё халқаро форумида иштирок этишга таклиф қилдилар.