Тошкент, Ўзбекистон (UzDaily.uz) — “Марказий Осиё – Европа Иттифоқи” биринчи саммитида сўзга чиққан Ўзбекистон Республикаси Президенти Шавкат Мирзиёев минтақавий иқтисодий ҳамкорлик, инвестиция ташаббуслари ва барқарор ривожланишга оид муҳим жиҳатларга тўхталиб ўтди.

Ўз нутқида у иқтисодиёт ва инфратузилмани ривожлантиришдаги ҳамкорликни кучайтириш, шунингдек, Ўзбекистоннинг ЕИ билан муносабатларни янада мустаҳкамлашга интилишини алоҳида таъкидлади.

Саммитда муҳокама этилган марказий масалалардан бири Марказий Осиёнинг жаҳон иқтисодиётидаги ўрни бўлди. Президент таъкидлашича, Европа тикланиш ва тараққиёт банки (ЕТТБ) мутахассисларининг фикрига кўра, минтақанинг ялпи ички маҳсулот ўсиши 6 фоизни ташкил этади, бу эса бошқа минтақа кўрсаткичларидан анча юқори. Бу ислоҳотлар самарадорлиги ва халқаро жараёнларда фаол иштирокни тасдиқлайди.

«Сўнгги йилларда Европа Иттифоқи билан ҳамкорлик сезиларли даражада фаоллашди. Марказий Осиё давлатларининг ЕИ билан савдо айланмаси етти йилда бир неча баробар ошиб, 54 миллиард еврога етди», — деди Шавкат Мирзиёев.

Унинг сўзларига кўра, иқтисодий ҳамкорликни кенгайтириш мақсадида Ўзбекистон ЕИ ҳамкорлари билан янги ташаббусларни амалга оширмоқда. Улар орасида июнь ойида бўлиб ўтадиган Тошкент инвестиция форуми ҳам бор.

ЕТТБ билан ҳамкорликда ташкил этиладиган ушбу форумда етакчи Европа компания ва банклари иштирокида жами 30 миллиард евродан ортиқ лойиҳалар портфели тақдим этилади.

Шавкат Мирзиёев минтақадаги саноат ва инновацион экотизим самарали фаолият кўрсатиши муҳимлигини қайд этиб, “TOTAL”, “Siemens”, “Linde” ва “Airbus” каби йирик Европа корпорациялари Ўзбекистон ва бошқа минтақавий мамлакатларда муваффақиятли иш олиб бораётганини таъкидлади.

Президент таъкидлаганидек, ушбу компаниялар инфратузилма, технологиялар ва экологик тоза ишлаб чиқаришни ривожлантиришга катта ҳисса қўшмоқда.

Саммит доирасида Тошкентда Европа инвестиция банкининг (ЕИБ) офисини очиш ҳам муҳим воқелик сифатида қайд этилди. Президентнинг фикрича, бу марказий осиё миқёсида тўғридан-тўғри инвестицияларни жалб этишга хизмат қилади.

Шу билан бирга, Президент “яшил” энергетика, инновациялар ва инфратузилмага инвестицияларни кенгайтириш, барқарор иқтисодий ўсиш учун қулай шароитлар яратиш зарурлигини ҳам алоҳида таъкидлади.

«Биз Европа ҳамкорларидан минтақавий миқёсдаги “яшил” энергетика, инновациялар, транспорт, инфратузилма ва қишлоқ хўжалиги соҳаларида йирик лойиҳаларни амалга ошириш учун Инвестиция платформасини ташкил этишда қўллаб-қувватлашларини кутамиз», — деди у. «Асосий мақсад — минтақада ҳаёт сифати яхшиланиши учун узоқ муддатли ва ўзаро манфаатли ҳамкорликни йўлга қўйишдир».

Шавкат Мирзиёев транспорт йўлакларини ривожлантириш ва Европа Иттифоқи билан боғловчи тизимли логистика инфратузилмасини шакллантириш ҳам алоҳида аҳамиятга эга эканини таъкидлади. Унинг сўзларига кўра, самарали транспорт коридорларининг етишмаслиги — маҳсулотларни Европа бозорларига етказиб беришдаги асосий тўсиқлардан бири ҳисобланади.

Шу муносабат билан у ЕИ ҳомийлигида муҳим транзит давлатлар транспорт вазирларининг учрашувини ўтказишни таклиф қилди. Учрашувнинг мақсади — Транскаспий транспорт коридорини кенгайтириш ва ундан фойдаланиш бўйича келишилган ёндашувларни ишлаб чиқишдан иборат.

Бундан ташқари, Президент қайта тикланадиган энергия манбалари (ҚТЭМ)ни ривожлантириш Ўзбекистоннинг стратегик устувор йўналиши эканини таъкидлади. «2030 йилгача мамлакатимиз энергия балансда ҚТЭМ улушини 54 фоизга етказишни режалаштирмоқда», — деди у. Ушбу режа доирасида янги қувватларни яратиш билан бир қаторда, углерод кредитлари бозори ривожлантирилади ва энергетика соҳасида экологик хавфсиз технологиялар жорий этилади.

Ҳамкорликнинг яна бир муҳим жиҳати — кичик ва ўрта бизнесни, айниқса, аёллар тадбиркорлигини қўллаб-қувватлашдир. Президент таъкидлашича, Ўзбекистон ЕИ билан биргаликда ушбу соҳада қўшма дастурни амалга оширишга тайёр. Шунингдек, “Марказий Осиё – ЕИ” Савдо-саноат палатасини ташкил этиш таклиф этилди. У хусусий сектор интеграцияси ва фаол бизнес ривожланишига хизмат қилади.

Шавкат Мирзиёев ишонч билан таъкидладики, ушбу асосий йўналишларда Европа Иттифоқи билан ҳамкорликни чуқурлаштириш барча томонлар учун катта фойда келтиради ва стратегик шерикликни янада мустаҳкамлаш учун пойдевор бўлиб хизмат қилади.