Тошкент, Ўзбекистон (UzDaily.uz) — Ўзбекистон Миграция агентлиги Туркиянинг йирик қурилиш компанияси Kalyon Insaat Sanayi Ve Ticaret A.Ş. билан республика фуқароларини ишга жойлаштириш бўйича келишувга эришди, деб хабар беради агентлик матбуот хизмати.

Учрашув давомида Миграция агентлиги директори Беҳзод Мусаев компания вакиллари билан турк қурилиш лойиҳаларида ўзбекистонликларни иштирок эттириш масалаларини муҳокама қилди.

Биринчи босқич доирасида, жорий йилнинг декабрь ойида Туркияга 60 нафар ўзбекистонлик ишга юборилади. Тузилган меҳнат шартномаларига мувофиқ, транспорт, яшаш, уч маҳаллик овқатланиш, махсус кийим ва шахсий ҳимоя воситалари каби барча харажатларни иш берувчи қоплайди.

Бундан ташқари, компания муносиб иш ҳақини ва меҳнат ҳуқуқларини таъминлашга кафолат беради.

Kalyon Insaat компаниясининг кадрлар бошқаруви директори Акин Кирчичек шундай деди: "Биз ўз лойиҳаларимизда банд бўлган ўзбекистонликларнинг меҳнат шароитларини диққат билан назорат қиламиз ва 2024 йилнинг январь ойида яна 1350 нафар мутахассисни Туркия бозорида иш билан таъминлаймиз".

Kalyon Insaat Sanayi Ve Ticaret A.Ş. 1974 йилдан буён Туркияда фаолият юритиб, қурилиш, энергетика ва транспорт соҳаларида йирик лойиҳаларни амалга ошириб келмоқда. Компаниянинг эътиборга молик объектлари қаторида Истанбул аэропорти, Босфор бўғози остидаги Мармарай темир йўл туннели ва Карапинардаги энг йирик қуёш электр станцияси бор.