Тошкент, Ўзбекистон (UzDaily.uz) — Ўзбекистон Республикаси Вазирлар Маҳкамаси ҳузуридаги Маданият ва санъатни ривожлантириш жамғармаси DOM Publishers нашриёти томонидан нашр этилган "Architekturführer. Taschkent" (ISBN 978-3-86922-550-0) сайёҳлик қўлланмаси юзасидан хавотир билдирган. “WHERE IN THE WORLD IS TASHKENT?” конференцияси натижаларига асосланган ушбу қўлланмада муаллифлик ҳуқуқларига оид масалалар мавжуд.

Жамғарма қуйидаги муаллифлик ҳуқуқларининг бузилишига эътибор қаратди:

-  Лойиҳа иштирокчиларининг матнларидан рухсатсиз фойдаланиш ёки муаллифлик нотўғри кўрсатилиши;
-  Музей экспонатларини тегишли рухсатларсиз қайта нашр этиш;
-  Архив ҳужжатларидан давлат органлари билан келишилмаган ҳолда фойдаланиш;
-  “Tashkent. Modernism XX/XXI” лойиҳаси доирасида олинган суратларни муаллифлар ва Жамғарма розилигисиз чоп этиш.

Жамғарма DOM Publishers’га расмий сўров юбориб, вазиятни аниқлаштиришни талаб қилди. Шу билан бирга, муаллифлик ҳуқуқлари ва этика қоидаларига риоя қилишнинг муҳимлиги алоҳида таъкидланди. Жамғарма ушбу масала бўйича конструктив ҳамкорлик ва икки томон учун мақбул ечим топиш умидини билдирди, келгусида бундай ҳолатлар такрорланмаслиги учун чоралар кўриш зарурлигини қайд этди.