Тошкент, Ўзбекистон (UzDaily.uz) — Қишлоқ хўжалиги вазирлигида вазирлик масъуллари ва Испаниянинг Ўзбекистондаги элчиси Рикардо Мартинез Васкес ўртасида учрашув бўлиб ўтди. 

Мулоқот чоғида икки томонлама ҳамкорликни ривожлантириш, янги лойиҳаларни татбиқ этиш ҳамда қишлоқ хўжалиги соҳасида тажриба алмашиш масалалари муҳокама қилинди. Хусусан, импорт-экспорт ҳажмини ошириш, талабалар алмашинуви, аграр тадбиркорлар ўртасида ҳамкорликни йўлга қўйиш бўйича амалга оширилаётган ишлар таҳлил қилинди.

Шунингдек, қишлоқ хўжалиги мутахассисларини ўқитиш, семинар-тренинглар ташкил этиш ва соҳа бўйича инновацион ёндашувларни жорий этиш муҳимлиги таъкидланди.

Бундан ташқари, қишлоқ хўжалиги кўргазмаларини ташкил этиш ва уларга Ўзбекистон ҳамда Испания ишбилармон доираларини жалб қилиш масалаларига алоҳида эътибор қаратилди.

Учрашув якунида томонлар ҳамкорликни жадаллаштиришга келишиб, муҳокама қилинган лойиҳа ва ташаббусларни амалга ошириш бўйича қўшма тадбирлар режасини ишлаб чиқишга келишиб олдилар.