Тошкент, Ўзбекистон (UzDaily.uz) — Ўзбекистон футболчилари ассоциацияси расман FIFPRO таркибига қўшилди. FIFPRO — бутун дунё бўйлаб 70 дан ортиқ профессионал футболчилар ассоциацияларини бирлаштирувчи халқаро федерациядир.

Қабул маросими Индонезияда FIFPROнинг Бош Ассамблеяси доирасида бўлиб ўтди. Илгари Ўзбекистон футболчилари ассоциацияси номзод мақомига эга эди, эндиликда эса ташкилотнинг тўлиқ аъзосига айланди.

Ўзбекистон футболчилари ассоциацияси 2017 йилда ташкил этилган ва шу вақтдан бери футболчиларнинг ҳуқуқлари ва манфаатларини ҳимоя қилиш йўлида фаолият олиб бормоқда.

1965 йилда ташкил этилган FIFPRO 65 000 дан ортиқ профессионал футболчилар манфаатларини ҳимоя қилади. Ташкилотнинг бош офиси Нидерландиянинг Хофддорп шаҳрида жойлашган бўлиб, унинг аъзолари дунёнинг турли мамлакатларидаги миллий футболчилар ассоциациялари ҳисобланади.