Тошкент, Ўзбекистон (UzDaily.uz) — Жорий йил 5 март куни Ўзбекистон делегациясининг Вена шаҳрига ташрифи доирасида «Ўзатом» агентлиги директори А.Ахмедхаджаев, ХАЭА бош директори Рафаэл Гросси билан учрашди.

Рафаэл Гросси Ўзбекистонда Президент Шавкат Мирзиёев раҳбарлигида амалга оширилаётган кенг кўламдаги ислоҳотларни юқори баҳолади ва 2024 йилнинг 4-5 декабрда Тошкент ва Самарқанд шаҳарларига амалга оширган расмий ташрифи натижасида эришилган икки томонлама ҳамкорликдаги муваффақият ва ютуқларга алоҳида тўхталиб ўтди.

Суҳбат чоғида икки томонлама ҳамкорликнинг асосий жиҳатлари, хусусан жорий лойиҳалар, истиқболли ҳамкорлик йўналишлари ва ядро технологиялари соҳасини норматив-ҳуқуқий жиҳатдан тартибга солиш масалалари муҳокама қилинди. Шунингдек, Ўзбекистоннинг ядро хавсизлиги ва тарқатмаслиги соҳасидаги халқаро ҳуқуқий ҳужжатларга қўшилиш масалалари муҳокама қилинди.

Шу ўринда ХАЭА халқаро мажбуриятларни амалга оширишда ва қонунчиликни замонавий талаблар билан мослаштиришга ёрдам бериш мақсадида халқаро юристлар гуруҳини юборишга тайёрлигини билдирди.

Учрашувда алоҳида эътибор "Йўл харитаси"даги "Умид нурлари" ва «ZODIAC» каби лойиҳаларга, шунингдек, радиация ва изотоп технологиялари соҳасидаги ташаббусларга қаратилди. Бундан ташқари, Ташкент филиалида кичик модулли реакторлар бўйича мутахассислар малакасини ошириш мактабини ўтказиш таклифи, шунингдек, Ўзбекистоннинг Atoms4Food дастурига қўшилиши орқали ишлаб чиқаришни яхшилаш ва маҳсулот сифатини ошириш мақсадида озиқ-овқат хавфсизлигини яхшилаш учун илғор ядро технологияларини жорий этишга қаратилган ХАЭА халқаро стандартларини пахта етиштиришда жорий этиш ташаббуси муҳокама қилинди.

Учрашув якунида ХАЭА раҳбари Ўзбекистоннинг атом энергетикаси ва ядро технологиялари соҳасидаги стратегик ташаббусларини ижобий баҳолади, уларнинг инновацион ва истиқболли жиҳатларини таъкидлади, шунингдек, халқаро ҳамкорликка содиқлигини қайд этди ва Ўзбекистон ХАЭАнинг минтақадаги асосий ҳамкори сифатидаги статусини тасдиқлади.