Тошкент, Ўзбекистон (UzDaily.uz) — 2024 йил январь-октябрь ойлари мобайнида Ўзбекистон жами 6,62 миллиард долларлик олтин экспорт қилган, деб хабар беради Статистика агентлиги.

Ушбу кўрсаткич 2023 йилнинг шу даврига нисбатан 3,5% га камайган.

Олтиннинг умумий экспорт таркибидаги улуши 29,5% ни ташкил қилди, бу ўтган йилга қараганда (33,6%) паст.

Шунингдек, Ўзбекистоннинг умумий ташқи савдо айланмаси 2024 йилнинг 10 ойида 54,4 миллиард долларни ташкил этди, бу 2023 йилнинг шу даврига нисбатан 6,7% ёки 3,4 миллиард долларга кўпдир.

Ташқи савдо айланмасида экспорт ҳажми 22,44 миллиард долларга етди (ўсиш 9,6%), импорт эса 31,92 миллиард долларни ташкил этди (ўсиш 4,7%).

Натижада ташқи савдо баланси манфий бўлиб, 9,48 миллиард долларни ташкил қилди.