Тошкент, Ўзбекистон (UzDaily.uz) — Осиё тараққиёт банки (ОТБ) Ўзбекистон Ҳукуматининг сув ресурсларини бошқариш секторини модернизация қилиш, сув хавфсизлигини яхшилаш ва мамлакатда хавфсиз ва ишончли сув таъминотидан фойдаланиш имкониятини ошириш борасидаги саъй-ҳаракатларини қўллаб-қувватлаш учун 125 миллион АҚШ доллари миқдорида қарз ажратилишини маъқуллади.

Иқлим ўзгаришини ҳисобга олган ҳолда сув ресурсларини ақлли бошқаришни яхшилаш лойиҳаси активларни бошқаришни ва хизматларни кўрсатиш барқарорлигини яхшилаш, шунингдек, миллий сув таъминоти корхонаси ходимларининг институционал салоҳиятини ошириш имконини беради.  Бу, шунингдек, қарорларнинг янада самарали қабул қилинишига ва сув ресурсларини бошқариш ва энергиядан фойдаланиш самарадорлигини яхшилашга олиб келади ва шу тарзда иқлим ўзгаришининг салбий оқибатларини юмшатишга ёрдам беради.

«Ўзбекистондаги сув ресурслари иқлим ўзгариши ва самарасиз фойдаланиш туфайли жиддий таҳдид остида», - деди ОТБнинг Ўзбекистондаги доимий ваколатхонаси Директори Канокпан Лао-Арайа. «ОТБ лойиҳаси Ўзбекистонда углерод изини камайтириш учун сувдан фойдаланишни яхшилаш, энергия сарфини камайтириш ва операцион самарадорликни ошириш учун сувни бошқаришнинг ақлли тизимларини жорий этади».

ОТБ лойиҳаси "Ўзсувтаъминот" акциядорлик жамияти (миллий сув таъминоти корхонаси) ва унинг ҳудудий филиалларига мамлакат бўйлаб асосий сув истеъмоли объектларида сув сарфини ҳисобга олиш ва телеметрия тизимини ўрнатишни якунлашда ёрдам беради.   Лойиҳа доирасида бутун сув таъминоти ва оқава сув инфратузилмаси, шу жумладан тахминан 4 миллион мижоз уланишлари учун активлар инвентаризация қилинади ва жойларда географик хариталаш ишлари амалга оширилади.

Коммунал хизматларни ИТ асосида иқлимга мослашган бошқариш тизимларининг интеграцияланган пакети ишга туширилади ва бу ўз ичига миллий сув таъминоти корхонаси ходимларига тегишли ўқув курсларини олади. Лойиҳа, шунингдек, мижозлар марказлари фаолиятини янги молия бошқаруви дастурий таъминотини тақдим этиш орқали яхшилаш имконини беради, бу эса халқаро стандартларга асосланган шаффоф молиявий ҳисоботларни яратиш имконини беради.

Лойиҳа эксплуатацион харажатларни қисқартириш, ишчи кучи самарадорлигини ошириш, шунингдек, мижозлар билан ўзаро алоқалар ва қониқишни яхшилаш учун ўзгартирувчи рақамли ечимлар ва технологияларни жорий этишга ёрдам беради.

Бу йил ОТБ ва Ўзбекистон Республикаси ўртасида ҳамкорлик бошланганига 30 йил тўлди.  Ўзбекистон Республикаси ОТБга  1995 йилда аъзо бўлгандан бери банк мамлакатга жами 14,3 млрд. АҚШ доллари миқдорида давлат сектори қарзи, грант ва техник кўмак тақдим этган.

ОТБ ўта қашшоқликка барҳам бериш бўйича саъй-ҳаракатларини давом эттириб, ривожланган, кенг қамровли ва барқарор Осиё ва Тинч океани минтақасига эришишга интилади.  ОТБ 1966 йилда ташкил этилган бўлиб, унга 69 мамлакат аъзо бўлган. Уларнинг 49 таси минтақада жойлашган.