Toshkent, O‘zbekiston (UzDaily.com) — Қозоғистоннинг Оқтоу шаҳрида Azerbaijan Airlines авиакомпаниясига тегишли самолёт ҳалокатга учради.

Embraer E190 самолёти "Боку-Грозний" йўналиши бўйича парвозни амалга ошираётган эди. Ҳаво шароити номутаносиб бўлгани сабабли, самарали қўниш учун самолёт аввал Маҳачқолага, сўнгра Оқтоуга йўналтирилган.

Қозоғистон Фавқулодда вазиятлар вазирлиги маълумотига кўра, ҳодиса жойига 52 қутқарувчи ва 11 та техника етказилган. У ерда самолёт ёнғини аниқланди ва ёнғинни бартараф этиш ишлари бошланган. Дастлабки маълумотларга кўра, ҳалокатдан тирик қолганлар бор.

Қозоғистон соғлиқни сақлаш вазири Акмарал Алназарованинг маълум қилишича, олти киши ўта оғир аҳволда. Кейинроқ 12 киши, жумладан, бир бола турли хил жароҳатлар билан Мангистау вилояти касалхонасига етказилгани маълум қилинди.

Ҳодиса вақтида самолётда 62 йўловчи ва 5 экипаж аъзоси бўлган. Ҳодиса жойида 14 та тез тиббий ёрдам жамоаси иш олиб бормоқда.

Қозоғистон Фавқулодда вазиятлар вазирлигининг маълумотига кўра, Azerbaijan Airlines самолёти ҳалокатида 25 киши қутқарилган, улардан 22 нафари тиббий ёрдам учун касалхонага олиб борилган.

Ҳодиса сабаблари ва тафсилотлари ўрганилмоқда. Қозоғистон Транспорт вазирлигининг дастлабки маълумотига кўра, бортда 37 нафар Озарбайжон фуқароси, 6 нафар Қозоғистон фуқароси, 3 нафар Қирғизистон фуқароси ва 16 нафар Россия фуқароси бўлган.