Албатта, ҳар қандай замонавий, бенуқсон йўл ҳам вақти келиб бирор қисми таъмирталаб ҳолга келиши мумкин. Асфальт ётқизиш, ҳосил бўлган чуқурларни кўмиб текислаш, йўлларга бирор инвентар ёки белгиларни ўрнатиш каби таъмирлаш ишларига кунда бўлмаса ҳам ҳафтада кўзимиз тушиб туради. Йўллар қанча тез ва сифатли таъмирланса, йўловчиларга шунча қулай бўлади. Лекин минг афсуски, бугун аксарият ҳолларда ана шу таъмирлаш ишлари пала-партиш, техника ва йўл хавфсизлиги қоидаларига зид тарзда шошқалоқлик билан бажариламоқда.

Ўзбекистон “Адолат” социал-демократик партиясининг “Жамоатчилик назорати – қонун устуворлигининг гарови” лойиҳаси доирасида маҳаллалардаги ички йўлларнинг аҳволини ўрганиш бўйича бир қанча ишлар амалга ошириб келинмоқда. Лойиҳа доирасида партия жамоатчилик назорати вакиллари пойтахтимизнинг шоҳ кўчалари ҳолатини ўрганишга қарор қилди.

Кузатувларимизни узоққа бормай, партия Марказий аппарати жойлашган ҳудуд атрофидан бошладик.

Гувоҳи бўлганингиздек, Чилонзор тумани “Байналмилал” кўчасининг “Муқимий” кўчаси билан кесишган чорраҳадаги мавжуд иккита чуқурчага дарахт шохлари тиқилиб, мато бўлаклари осиб қўйилган. Ўтган йилда ободонлаштирилиб, шаҳримизнинг энг кўркам манзилларидан бирига айланган гўшасига “юзга тушган доғдек” хунуклик бахш этган. Кўринишидан ёғингарчилик сувларини қочиришга мўлжалланган мазкур қувурлар аслида бир неча йиллардан буён мавжуд. Сифатсиз амалга оширилган таъмирлашдан кейин кўп ўтмай темир панжаралари ўпирилиб тушиб, йўловчиларга хавф туғдираётган мазкур қувурларга анчадан буён ҳеч бир мутасадди ташкилот эътибор қаратмагани ажабланарли. Шу кунгача ушбу чуқурчаларга тушиб кетмаслик учун ҳайдовчилар уларни айланиб ўтишга мажбур бўлмоқда. Ушбу чорраҳадан юравериб кўникиб қолган ҳайдовчиларга-ку унчалик билинмас, аммо, бу йўлдан биринчи марта ўтаётганлар учун кутилмаган хавф бўлиб турган ушбу чуқурчалар, айниқса, куз-қиш мавсумида ҳақиқий хатарнинг ўзгинасига айланади.

Хўш, халқ томонидан токайгача йўлдаги бу каби ҳолатларни шох-шабба, парча матолар билан белгилаб қўйилади. Наҳотки, йўлга мутасадди бўлган ташкилотлар, қонунларда кўрсатиб қўйилганидек, огоҳлантирувчи йўл белгиларини ўрнатиб, махсус инвентарлар билан уларни ажратиб қўйишмайди. Аслида, йўл ҳаракати хавфсизлиги нуқтаи-назаридан олинганда йўлдаги бундай жойлар ҳаракатланишдан ажратиб қўйилиб, бир неча метр олдиндан огоҳлантирувчи йўл белгилари қўйилиши, энг муҳими носоз йўлни тезроқ таъмирдан чиқариш керак эмасми.

Пойтахтимизнинг Марказий кўчаларидан бири ҳисобланган "Бунёдкор" шох кўчасининг мазкур қисмида, йўлни таъмирлаш ишлари олиб борилаётганига гувоҳ бўлдик. Аммо, бу ерда ҳам на йўл ҳаракати хавфсизлиги қоидаларига, на техника хавфсизлигига эътибор қаратилмаган. Ҳеч қандай огоҳлантирувчи йўл белгиларисиз таъмирлаш ишларини олиб бораётган мана бу ишчилар ҳам ҳеч қандай махсус ҳимоя кийимларисиз, қолаверса, таъмирлашда иштирок этаётган экскаваторни таянчсиз ишлатмоқда. Шунингдек, таъмирлаш олиб борилаётган йўл қисми бошқа транспорт воситаларидан ажратиб ўраб қўйилмаган. Бу эса ҳаракат қатнашчилари ҳаётига жиддий хавф туғдиради. Мана бу экскаваторга эса “Таъмирлаш ишлари” 1.23 йўл белгиси ёпиштириб қўйилган. Аслида, йўл ҳаракати қоидаларига кўра, ушбу йўл белгиси хавфли ҳудуддан аҳоли яшайдиган жойларда 50-100 метр оралиқ масофада ўрнатилиши шарт. Бунда таъмирлаш ишлари олиб борилаётган ҳудуд махсус тўсиқ билан ўраб олиниши лозим.

Худди шунингдек, тозалаш ишларини олиб бораётган ишчилар ҳам йўл қоидаларига қатъий риоя қилишлари керак.

Юқоридаги ҳолатлар юзасидан туғилган саволларимизга жавоб олиш мақсадида Тошкент шаҳар Ички ишлар бош бошқармаси Йўл ҳаракати хавфсизлиги бошқармасига мурожаат этганимизда тегишли мутасаддилар биз билан учрашиб, саволларимизга жавоб беришдан турли баҳоналар билан ўзларини олиб қочишди. 3 кун давом этган ушбу жараёндан сўнг улардан тайинли жавоб олишга кўзимиз етмагач, ушбу материални шу ҳолича эътиборингизга ҳавола этдик.

Биз бу ерда кимнидир айбдор қилиб, уни танқид қилишдан йироқмиз. Бизнинг мақсадимиз жойларда қонун-қоидаларга тўлиқ риоя этилишига эришиш, пировардида ҳар бир инсоннинг саломатлиги ва хавфсизлигини таъминлашга эришишдир.

Али Қосимов, Ўзбекистон “Адолат” СДП Жамоатчилик назорати гуруҳи вакили