Тошкент, Ўзбекистон (UzDaily.uz) — Ўзбекистонлик аспирант пахта пояларидан қоғоз ишлаб чиқариш технологиясини ишлаб чиқди. САФУ Табиий фанлар ва технологиялар олий мактабида олиб борилган унинг тадқиқоти пахтачилик чиқиндиларини қайта ишлаш ва аграр давлатларда қоғоз саноати учун хомашё етишмовчилиги муаммосини ҳал этишга қаратилган. Бу ҳақда САФУ матбуот хизмати хабар берди.

Лойиҳа ташаббускори Исмоил Содиқов тажрибалар учун хомашёни ўз ватанидан олиб келди. Унинг таъкидлашича, ситс ишлаб чиқариш ва пахта экспорт қилиш бўйича етакчи бўлган Ўзбекистонда ҳосил йиғим-терими якунланганидан сўнг асосан ёқиб юбориладиган ёки қишлоқ хўжалигида ишлатиладиган қуруқ пахта поялари қолади.

«Целлюлозани ҳар қандай толали хомашёдан олиш мумкин, ва мен пахта поялари асосида Ўзбекистонда қоғоз ишлаб чиқаришни йўлга қўйиш ғоясига келдим. Бу мамлакатнинг қоғозга бўлган эҳтиёжини қисман қоплаш имконини беради ва йирик заводлар қурмасдан ҳам амалга оширилиши мумкин», — деди тадқиқотчи.

Лойиҳа САФУнинг «Шимол биоресурсларини қайта ишлашнинг замонавий технологиялари» инновацион-технологик маркази доирасида амалга оширилмоқда. Целлюлоза-қағоз ва ўрмон-химия ишлаб чиқариш кафедраси мудири Наталия Щербакнинг таъкидлашича, бундай технологиялар СССР даврида қўлланилган бўлиб, улар ҳозирги талабларга мослаштирилмоқда.

Ўзбекистонда ўрама материалларига бўлган талабнинг ўсиши шароитида мазкур ишланма маҳаллий целлюлоза-қағоз саноатини ривожлантиришда муҳим роль ўйнаши мумкин.