Тошкент, Ўзбекистон (UzDaily.uz) — Ўзбекистонда биржа савдоларида валютали облигацияларни муомалага киритиш ва маҳаллий ҳамда хорижий инвесторлар учун «регуляторлик майдончаси»нинг амал қилиш доирасини кенгайтириш режалаштирилмоқда.

Тегишли қонун лойиҳаси жамоатчилик муҳокамаси учун эълон қилинди.

Ҳужжатга кўра, Ўзбекистон биржаларида валютали облигацияларни чиқариш ва уларни муомалага киритиш учун ихтисослаштирилган платформалар ташкил этилиши таклиф қилинмоқда.

Ушбу облигациялар эмитенти сифатида мамлакат резидентлари ҳам, норезидентлари ҳам иштирок этиши мумкин. Шунингдек, юридик шахсларга қимматли қоғозлар бўйича мажбуриятларни бажариш учун валюта харид қилишга рухсат берилади.

Қонун лойиҳасида «регуляторлик майдончаси» режими амал қилиш муддатини чекланмас ҳолда узайтириш назарда тутилган. Бу дастурда сўнгги икки йилда дефолт ҳолатлари кузатилмаган ва назорат органлари томонидан жазога тортилмаган маҳаллий компаниялар иштирок этиши мумкин.

«Регуляторлик майдончаси» доирасида маҳаллий ва хорижий иштирокчилар халқаро компаниялар облигацияларига, давлат облигацияларига ва биржа фондларига (ETF) сармоя киритиш имконига эга бўладилар. Шунингдек, халқаро молиявий муассасаларга сўмда облигация чиқариш ҳуқуқи берилади.

Лойиҳага кўра, 2025 йилнинг 1 майигача инвестиция фондлари, жумладан биржа ва кўчмас мулк фондлари фаолиятини тартибга солувчи ҳужжат ишлаб чиқилиши лозим.

Қонун лойиҳасини муҳокама қилиш 28 январгача давом этади, ва Ўзбекистон фуқаролари ўз таклиф ва мулоҳазаларини йўллашлари мумкин.