Тошкент, Ўзбекистон (UzDaily.uz) — Диний ишлари бўйича қўмита туроператорлардан умра зиёратини ташкил этиш учун лицензия олиш бўйича аризалар қабул қилишни бошлади. Бу ҳақда маълумот қўмитанинг расмий веб-сайтида эълон қилинди.

Аризани кўриб чиқиш учун мурожаат этувчи 3 БҲМ (1,12 млн сўм) миқдорида тўлов қилиш лозим, лицензия берилиши учун эса 10 БҲМ (3,75 млн сўм) миқдорида давлат божи белгиланган. Аризалар 7 мартдан 7 апрель 18:00 гача қабул қилинади. Қўшимча маълумот олиш учун қўмитанинг 71−207−17−58 (ички 124) телефонига мурожаат қилиш мумкин.

Эслатиб ўтамиз, 2024 йил ноябрда Вазирлар Маҳкамаси зиёрат туризмни ташкил этиш ҳуқуқига эга компаниялар рўйхатини тасдиқлаган эди. Унга 12 компания киритилган бўлиб, улардан олти таси Тошкентдан, учтаси Намангандан, биттадан компания эса Андижон, Марғилон ва Урганчдан.

Талабларга мувофиқ, умра зиёратини ташкил этувчи компаниялар «Зиёрат» жамғармасига $1 млн миқдорида маблағ киритиши ва Саудия Арабистонидаги ҳамкор ташкилот билан шартнома тузиши лозим. Улар зиёратчиларнинг тиббий хизматлари, озиқ-овқати, меҳмонхонада жойлашиши ва саёҳат билан боғлиқ бошқа масалалар учун жавобгар ҳисобланади.