Тошкент, Ўзбекистон (UzDaily.uz) — Ўзбекистонда Хитой маркетплейси Temu га кириш блокланди.

Сайтни очишга уринишда фойдаланувчилар «5 сентябрь 2018 йилдаги Вазирлар Маҳкамасининг 707-сонли қарори асосида ахборот манбасига кириш чекланган» деган хабарни кўришмоқда.

Платформанинг мобил иловаси ҳам барқарор ишламай, узилишлар билан ишламоқда.

Temu га нисбатан чекловлар қўлланилиши мумкинлиги ҳақида март ойи бошидаёқ маълум бўлган эди. Миллий истиқболли лойиҳалар агентлиги ва Солиқ қўмитасининг қўшма баёнотида, 2024 йил 26 декабрдаги 885-сонли Вазирлар Маҳкамаси қарорига мувофиқ, электрон тижорат операторлари, жумладан, онлайн савдо платформалари фақатгина Ўзбекистонда резидент сифатида рўйхатдан ўтган компаниялар бўлиши кераклиги таъкидланган. Мазкур меъёрий ҳужжат расман эълон қилинган пайтдан эътиборан кучга кирган.

Ўзбекистон бозорида фаолият юритаётган хорижий маркетплейслар таҳлили жараёнида миллий қонунчилик талабларига зид ҳолатлар аниқланган. Бузилишлар электрон тижорат, чакана савдо, реклама, шахсий маълумотларни ҳимоя қилиш, истеъмолчилар ҳуқуқлари ҳамда муаллифлик ва турдош ҳуқуқлар соҳаларига тааллуқли бўлган.

Шу сабабли, 2025 йил 20 мартдан бошлаб Temu га Ўзбекистон ҳудудида кириш чекланиши эълон қилинган. Бироқ маркетплейс Ўзбекистон резиденти сифатида рўйхатдан ўтган тақдирда маҳаллий қонунчилик талабларига риоя қилган ҳолда фаолиятини тиклаш имкониятига эга бўлади.

18 март куни Солиқ қўмитаси Temu юридик шахс сифатида Ўзбекистонда рўйхатдан ўтгани ва солиққа тортиш тизимига кирганини маълум қилди. Аммо давлат органи таъкидлашича, компаниянинг олдинги фаолият даврларига оид масалалар ҳали ҳам ҳал қилинмаган, шу боис ҳозирда музокаралар олиб борилмоқда.

Барча расмий жараёнлар якунланганидан сўнг, Temu нинг Ўзбекистондаги келгуси фаолияти бўйича якуний қарор эълон қилинади.