Тошкент, Ўзбекистон (UzDaily.uz) — Ўзбекистоннинг ҳар бир ҳудудида ичимлик суви сифатини текшириш учун марказий лабораториялар ташкил этилиши режалаштирилмоқда.

Мазкур ташаббус 2025 йил учун мўлжалланган давлат дастури лойиҳаси доирасида киритилган бўлиб, у атроф-муҳитни муҳофаза қилиш ва яшил иқтисодиётни ривожлантиришга йўналтирилган.

Лабораториялар бевосита ёки санитария-эпидемиологик осойишталик ва жамоат саломатлиги ҳудудий бўлимлари билан шартнома асосида фаолият юритиши кутилмоқда.

Барча янги лабораториялар белгиланган техник талаблар асосида жиҳозланади.

Ушбу дастур ижроси "Ўзсувтаъминот" АЖ зиммасига юклатилган.

Ташаббуснинг асосий мақсади — мамлакат бўйлаб ичимлик суви сифатини назорат қилиш тизимини яхшилаш.