Тошкент, Ўзбекистон (UzDaily.uz) — Ўзбекистонда маиший чиқиндиларни йиғиш ва олиб чиқиб кетиш соҳасида тўлов интизомини кучайтиришга қаратилган қонун қабул қилинди. Бу ҳақда Адлия вазирлиги хабар бермоқда.

Ҳужжатга мувофиқ, Фуқаролик ва Уй-жой кодекси, шунингдек, “Рақобат тўғрисида” ва “Электроэнергетика тўғрисида”ги қонунларга ўзгартиш ва қўшимчалар киритилди.

Янги қонунга кўра, чиқиндиларни йиғиш ва олиб чиқиб кетиш хизмати учун қарзи мавжуд бўлган истеъмолчиларга SMS-хабарномалар юборилади. Агар қарз ўз вақтида тўланмаса, бундай истеъмолчилар учун электр энергиясига тўловларни қабул қилиш вақтинчалик чекланади ва бу чеклов қарз тўлиқ қопланмагунча амал қилади.

Шунингдек, чиқиндиларни йиғиш ва олиб чиқиб кетиш хизматларини кўрсатувчи ташкилотлар ҳисоб-китобларни аниқлаш ва тўлов тизимининг ишончлилигини таъминлаш мажбуриятини олди.

Қонун уч ойдан сўнг кучга киради.