Тошкент, Ўзбекистон (UzDaily.uz) — 2024 йилнинг январидан декабригача бўлган даврда Ўзбекистон Республикасида ҳар 100 та хонадонга ўртача 356 та мобил телефон тўғри келган. Бу ҳақда Миллий статистика қўмитаси уй хўжаликларини танлаб ўрганиш натижаларига асосланиб хабар берди.

Охирги йилларда статистик маълумотлар аҳолининг мобил қурилмалар билан таъминланганлик даражаси кескин ўсганини кўрсатмоқда.

Хусусан, 2005 йилда 100 та хонадонга атиги 79 та мобил телефон тўғри келган.

2010 йилга келиб бу кўрсаткич 145 тага етган, 2015 йилда эса 234 тага ошган. 2020 йилда 100 та хонадонга 287 та мобил телефон тўғри келган бўлса, 2024 йилда бу рақам 356 тага етди.