Тошкент, Ўзбекистон (UzDaily.uz) — Жорий йилнинг 16 июнь куни Тошкент шаҳрида Ўзбекистон Республикаси инвестициялар, саноат ва савдо вазири Лазиз Кудратов Осиё тараққиёт банки (ОТБ) вице-президенти Бҳаргав Дасгупта билан учрашди.

Учрашувда Ўзбекистон ва ОТБ ўртасидаги 30 йиллик стратегик ҳамкорлик натижалари ҳамда истиқболлари муҳокама қилинди. Хусусан, «яшил» иқтисодиётга ўтиш, хусусий секторни ривожлантириш, инсон капиталини мустаҳкамлаш ва молиявий бозорларни модернизация қилиш соҳаларидаги лойиҳаларга алоҳида эътибор қаратилди.

2025 йилга мўлжалланган қўшма ташаббуслар кўриб чиқилди, жумладан: суверен бўлмаган молиялаштириш ҳажмини кенгайтириш, давлат-хусусий шериклик (ДХШ) лойиҳаларини ривожлантириш, экологик саноат зоналари ва инновацион ишлаб чиқариш қувватларини яратиш, экспортни қўллаб-қувватлаш чоралари.

Томонлар, шунингдек, кичик бизнесни қўллаб-қувватлаш бўйича амалга оширилаётган қўшма дастур доирасидаги ишларни алоҳида кўриб чиқдилар.

Учрашув якунида томонлар ҳамкорликни чуқурлаштириш ва Ўзбекистонда лойиҳаларни амалга оширишда ОТБнинг бозор механизмларига асосланган ёндашувларини қўллаб-қувватлашга тайёр эканликларини тасдиқладилар.