Тошкент, Ўзбекистон (UzDaily.uz) — Боку шаҳрида Ўзбекистон Инвестициялар, саноат ва савдо вазирлиги ҳамда Озарбайжоннинг NEQSOL Holding компанияси ўртасида ҳамкорлик тўғрисида келишув имзоланди.

Ушбу ҳужжат бир қатор асосий йўналишларда қўшма инвестиция лойиҳаларини амалга оширишни назарда тутади. Улар жумласига қуйидагилар киради: қурилиш материаллари ишлаб чиқариш, геология ва кончилик, телекоммуникация инфратузилмасини ривожлантириш, энергетика ва «яшил» энергия, кимё саноати, рақамли технологиялар ва инновацион стартаплар.

Томонлар лойиҳаларни биргаликда ишлаб чиқиш, ахборот алмашинуви ҳамда Ўзбекистон томонидан сармоялар учун қулай шароитлар яратишга кўмаклашиш масалаларида келишувга эришди.

NEQSOL Holding — 10 дан ортиқ мамлакатда активларга эга бўлган халқаро холдинг компанияси бўлиб, саноат, рақамлаштириш ва шаҳар инфратузилмаси соҳаларига ихтисослашган.