Тошкент, Ўзбекистон (UzDaily.uz) — Ўзбекистон Ташқи ишлар вазири ўринбосари Олимжон Абдуллаев Германиянинг «SBH West GmbH» («Stiftung Bildung & Handwerk») ташкилоти вакиллари билан учрашди. Мазкур ташкилот таълим ва касбий ривожланиш соҳасида ихтисослашган.

Учрашув давомида Ўзбекистон ва Германия ўртасида касбий таълим ҳамда миграция соҳасидаги ҳамкорликни мустаҳкамлашга қаратилган асосий масалалар муҳокама қилинди. Асосий эътибор уч томонлама меморандумни амалга оширишга қаратилди. Меморандум ўзбекистонлик фуқароларни Германияда юк машиналари ва автобус ҳайдовчилари сифатида иш билан таъминлашни қўллаб-қувватлашга йўналтирилган.

Ўзбекистоннинг ҳудудларида «SBH West GmbH» ўқув марказлари филиалларини ташкил этиш бўйича келишувга эришилди. Ушбу марказларда Германия меҳнат бозори талабларига мослаштирилган касбий таълим дастурлари амалга оширилади. Бу дастурлар битирувчиларга зарур кўникма ва малака ҳосил қилиш имкониятини беради ва уларни Германияда муваффақиятли иш билан таъминлашга ёрдам беради.

Эришилган келишувларни амалга ошириш Ўзбекистон фуқаролари учун халқаро меҳнат бозорида янги иш ўринлари яратилишига кўмаклашади ҳамда таълим, миграция ва касбий ривожланиш соҳасида Ўзбекистон ва Германия ўртасидаги икки томонлама ҳамкорликни ривожлантиришда муҳим қадам бўлади.