Тошкент, Ўзбекистон (UzDaily.uz) — Рақамли технологиялар вазири Шерзод Шерматов юртимизда амалий ташриф билан бўлиб турган Америка Қўшма Штатлари Президентининг глобал шерикликлар бўйича махсус вакили Паоло Замполли билан учрашув ўтказди.

Учрашув аввалида делегация аъзолари учун Рақамли технологиялар вазирлиги ҳамда IT Park Uzbekistan, «Uzbekkosmos» агентлиги фаолияти бўйича тақдимот ўтказилди. Шунингдек, мамлакатимизда амалга оширилаётган ислоҳотлар, келгусидаги режалар ва эришилган натижалар ҳақида батафсил маълумот берилди. Ташриф доирасида, IТ мутахассисларини тайёрлашга ихтисослашган Ustudy IT академияси, UZSOC ҳамда Ягона интегратор UZINFOCOM фаолияти билан таништирилди.

Асосий музокаралар давомида икки томонлама ҳамкорликни янги босқичга олиб чиқиш масалалари муҳокама қилинди. Хусусан, дата марказларни ривожлантиришда ҳамкорлик қилиш, космик йўналишда қўшма лойиҳалар амалга ошириш имкониятлари, сунъий интеллект технологияларини жорий этиш, рақамли хизматлар экспортини кенгайтириш ва стартап экотизимини қўллаб-қувватлаш каби йўналишлар бўйича фикр алмашилди.

Вазир музокаралар давомида Ўзбекистонда рақамли иқтисодиётни ривожлантириш, IТ хизматлар экспортини ошириш ва ёшлар учун янги имкониятлар яратиш бўйича амалга оширилаётган ишлар ҳақида тўхталиб ўтди. Шу билан бирга, мамлакатимизнинг халқаро нуфузини ошириш ҳамда инглиз тилини ўқитиш ва ривожлантириш йўналишида амалга оширилаётган лойиҳалар ҳақида ҳам маълумот берди.

Учрашув якунида томонлар рақамлаштириш соҳасида ҳамкорликни янада кенгайтириш учун катта салоҳият мавжудлигини таъкидлаб, Ўзбекистон ва АҚШ ўртасидаги ҳамкорликни янги босқичга олиб чиқишга тайёр эканликларини билдирди. Паоло Замполли эса Ўзбекистонда амалга оширилаётган кенг кўламли ислоҳотларни юқори баҳолаб, келгусида қўшма ташаббусларни амалга оширишга тайёрлигини билдирди.