Тошкент, Ўзбекистон (UzDaily.uz) — 2 апрель куни “Марказий Осиё – Европа Иттифоқи” саммити арафасида Ўзбекистон Республикаси инвестициялар, саноат ва савдо вазири Лазиз Кудратов “Air Products and Chemicals Inc” компанияси бош ижрочи директори Эдуардо Менезес билан учрашди.

Томонларнинг диққат марказида фойдаланишга топширилган лойиҳаларнинг самарадорлиги, амалга оширилаётган ва янги истиқболли ва ўзаро манфаатли ташаббусларни ҳаётга татбиқ қилиш масалалари бўлди.

Лазиз Кудратов компаниянинг Ўзбекистондаги муваффақиятли тажрибасини таъкидлади. 2019 йилдан буён компания мамлакатимиз ҳудудларида умумий қиймати 1,15 миллиард доллар бўлган учта йирик инвестиция лойиҳасини амалга оширди. Улар орасида Фарғона нефтни қайта ишлаш заводида водород ишлаб чиқариш ва «Навоиязот» АЖда суюқ карбонат ангидрид газини ишлаб чиқариш.

Бугунги кунда компания Бухородаги МТО мажмуасида кислород ва азот ишлаб чиқариш бўйича лойиҳаларни амалга оширмоқда ва 200 миллион доллардан ортиқ сармоя киритган. Мажмуа пластмасса, автомобилсозлик ва қурилиш каби соҳаларни метанол ва олефин билан таъминлашга молжалланган.

Углеродни ушлаш ва сақлаш, авиация ёқилғиси ишлаб чиқариш ва кўмирни газлаштириш бўйича янги лойиҳалар ҳам кўриб чиқилмоқда.

Учрашув якунлари бўйича томонлар ҳамкорликни янада чуқурлаштиришга ўзаро тайёр эканликларини тасдиқладилар ва жорий лойиҳаларни муваффақиятли якунлаш ҳамда янги лойиҳаларни амалга ошириш доирасида самарали ҳамкорлик қилиш механизмларини ишлаб чиқдилар.