Тошкент, Ўзбекистон (UzDaily.uz) — Ўзбекистон Республикаси ташқи ишлар вазири Бахтиёр Саидов Қатар Давлати Амири Шайх Тамим бин Ҳамад Ол Соний билан учрашди.

Саидовнинг сўзларига кўра, учрашув чоғида у амирга Ўзбекистон Президенти Шавкат Мирзиёевнинг энг самимий саломи ва эзгу тилакларини етказган.

Суҳбат очиқ ва дўстона руҳда ўтди. Томонлар Қатарнинг тараққиётидаги ҳайратланарли ютуқларини қайд этиб, савдо, сармоя, инновациялар, таълим ва маданий алмашинув соҳаларида Ўзбекистон-Қатар ҳамкорлигини янада мустаҳкамлаш истиқболларини муҳокама қилдилар.

Икки халқ фаровонлигини юксалтиришга хизмат қиладиган янги имкониятлар яратишга алоҳида эътибор қаратилди.

“Халқларимиз ўртасидаги ишонч, ўзаро ҳурмат ва самимий дўстликка асосланган, келажакка йўналтирилган ҳамкорликни йўлга қўйиш тарафдоримиз, – деди Ўзбекистон ТИВ раҳбари.

У Ўзбекистон Қатарни ишончли ва узоқ муддатли ҳамкор сифатида юксак қадрлашини ва қўшма ташаббусларни амалга оширишни интиқлик билан кутаётганини таъкидлади.