Тошкент, Ўзбекистон (UzDaily.uz) — Ўзбекистонда пальма ёғи ҳамда уни ўз ичига олган маҳсулотлар ва транс ёғларни мажбурий лаборатория синовидан ўтказиш талаби жорий этилмоқда. Бу 30 январь куни Президент фармони билан тасдиқланган.

1 мартдан бошлаб мамлакатга олиб кириладиган пальма ёғи, шунингдек, уни ва трансизомер ёғ кислоталарини (транс ёғлар) ўз ичига олган маҳсулотлар, жумладан, сут ва сут маҳсулотлари учун санитария-эпидемиология хулосасини олишда аккредитациядан ўтган лабораторияларда мажбурий тест синовлари ўтказилади.

Текширувлар амалдаги техник регламент ва стандартларга мувофиқ амалга оширилади.

Бундан ташқари, маҳаллий озиқ-овқат маҳсулотларида пальма ёғидан фойдаланиш устидан назорат кучайтирилади. Назорат органлари озиқ-овқат маҳсулотларини ишлаб чиқариш, транспортировка қилиш, сақлаш ва сотиш билан шуғулланувчи корхоналарда инспекциялар ўтказади.