Тошкент, Ўзбекистон (UzDaily.uz) — Ўзбекистон Республикаси Миграция агентлиги фуқароларга хорижда ноқонуний меҳнат фаолияти билан боғлиқ хавф-хатарлар ҳақида огоҳлантириш билан чиқди.

Ўзбекистон Республикаси Вазирлар Маҳкамасининг 2025 йил 22 апрелдаги 252-сонли қарорига мувофиқ, фуқароларини хорижда ташкиллаштирилган тартибда ишга жойлаштириш фаолияти билан Миграция агентлиги шуғулланади. Шунингдек, “Хусусий бандлик агентликлари тўғрисида”ги Қонун га мувофиқ, фақат Миграция агентлиги томонидан лицензия берилган хусусий бандлик агентликлари ушбу фаолият билан шуғулланишга ҳақли.

Бундай компанияларнинг расмий рўйхати очиқ тарзда эълон қилинган.

Миграция агентлиги томонидан ўтказилган назорат тадбирларда "баъзи бир ишбилармонлар"нинг ижтимоий тармоқлардаги эълонлар орқали консалтинг ёки ахборот хизмати ниқоби остида фуқаролардан пул йиғиб хизмат кўрсатмаганликлари ҳамда лицензиясиз хорижга ишга жўнатиш билан шуғулланаётганлари аниқланган.

Текширувлар натижасида WORLDVISA MCHJ, Everyone Consult MCHJ, Adworld Group MCHJ, RICH RESULT MCHJ ва Ravon Consult Group MCHJ қонунбузарлик учун жавобгарликка тортилди ҳамда ҳар бирига 112,5 млн сўм миқдорида жарима белгиланди. Ҳужжатлар Тошкент, Урганч ва Бекабод шаҳарлараро иқтисодий судларига юборилди.

Агентликда таъкидланишича, лицензиясиз тузилмалар орқали ишга жойлашишга уриниш жиддий молиявий йўқотишлар ва ҳуқуқий оқибатларга олиб келиши мумкин.

Фуқароларга фақат расмий реестрга киритилган компанияларга мурожаат қилиш, шартномаларни имзолашдан олдин пухта ўрганиш ва шубҳали тўловлардан сақланиш тавсия этилди.