Тошкент, Ўзбекистон (UzDaily.uz) — Ўзбекистон ҳукумати Ислом тараққиёт банки (ИТБ) кўмагида кичик ва ўрта бизнесни (КЎБ) молиявий барқарорлигини мустаҳкамлаш бўйича йирик лойиҳани амалга оширишни бошлади. Бу ҳақда 2024 йил 30 декабрдаги Вазирлар Маҳкамасининг қароридан маълум қилинди.

2024 йил апрель ойида имзоланган келишувга мувофиқ, ИТБ лойиҳага $30 миллион ажратади. ИТБ таркибидаги Ислом ҳамжиҳатлиги ривожланиш фонди (ISFD) эса яна $10 миллион тақдим этади. Жами молиялаштириш ҳажми $40 миллионни ташкил этади. 

Шундан $30 миллион кичик бизнесни муробаҳа (исломий молиялаштириш воситаси) асосида қўллаб-қувватлаш учун йўналтирилади. $7,5 миллион Савдо ривожлантириш компаниясига кредитлар бўйича кафолатлар тақдим этиш учун ажратилади.

$1,75 миллион бизнес-инжиниринг дастурлари ва тадбиркорларнинг салоҳиятини ошириш учун сарфланади. Қолган маблағлар лойиҳани бошқариш, аудит ўтказиш ва кутилмаган харажатлар учун захира яратишга йўналтирилади.

Ажратилган маблағлар 10 йиллик муддатга тақдим этилади, шундан 3 йили имтиёзли даврни ўз ичига олади. Қўшимча харажатлар 10 йиллик ўртача своп кўрсаткичига 1,85% қўшилган ҳолда ҳисобланади.

Лойиҳанинг асосий мақсадлари: кичик бизнесни қўллаб-қувватлаш ва ривожлантириш, уларнинг молиявий барқарорлигини ошириш, Ўзбекистонда тадбиркорлик сектори ва иқтисодий ўсишни мустаҳкамлаш.

Лойиҳа 2025–2027 йиллар давомида амалга оширилади ва қўшимча равишда турли молия манбаларидан $100 миллионгача маблағ жалб этиш режалаштирилган.

Бу лойиҳа тадбиркорлик фаоллигини рағбатлантириш ва барқарор иқтисодий ўсишни таъминлашга қаратилган давлат стратегиясининг бир қисми ҳисобланади.